കോട്ടയം: സോഷ്യല് മീഡിയയില് പരിചയപ്പെട്ട പെണ്കുട്ടിയ്ക്കൊപ്പം വാലന്റയിന്സ് ദിനം ആഘോഷിക്കാന് ആലുവയില് നിന്നും കോട്ടയം കുമാരനല്ലൂരില് എത്തിയ നാലു കുട്ടികളെ നാട്ടുകാര് തടഞ്ഞുവച്ചു.
നാട്ടുകാര് തടഞ്ഞ കുട്ടികളെ ചോദ്യം ചെയ്ത ശേഷം ഗാന്ധിനഗര് പോലീസില് ഏല്പ്പിച്ചു. ഇന്നലെ ഉച്ചയോടെ കുമാരനല്ലൂരിലായിരുന്നു സംഭവം. ആലുവയില് നിന്നുള്ള നാലംഗ സംഘമാണു സോഷ്യല് മീഡിയ വഴി പരിചയപ്പെട്ട കുമാരനല്ലൂര് സ്വദേശിയായ പെണ്കുട്ടിയെ കാണാന് എത്തിയത്. ആലുവയില് നിന്നും വാടകയ്ക്ക് എടുത്ത ഇന്നോവയിലായിരുന്നു കുട്ടികളുടെ വരവ്. കുമാരനല്ലൂര് ഭാഗത്ത് എത്തിയ കുട്ടികള് വഴിയറിയാതെ സംശയത്തില് തപ്പിത്തിരക്കുകയായിരുന്നു.
ഇതോടെ സംശയം തോന്നിയ നാട്ടുകാരില് ചിലര് കുട്ടികളെ തടഞ്ഞുവച്ചു. തുടര്ന്നു ചോദ്യം ചെയ്തതോടെയാണു കുട്ടികളുടെ സംഘം വാലന്റയിന്സ് ഡേ ആഘോഷിക്കുന്നതിനായി എത്തിയതാണെന്നും കണ്ടെത്തിയത്.
ഇതോടെ നാട്ടുകാര് വിവരം ഗാന്ധിനഗര് പോലീസില് അറിയിച്ചു. പോലീസ് സംഘം സ്ഥലത്ത് എത്തി കുട്ടികളെ സ്റ്റേഷനിലേയ്ക്കു കൊണ്ടു പോയി. കുട്ടികള്ക്കു പ്രായപൂര്ത്തിയാകാത്തതിനെ തുടര്ന്നു കുട്ടികളെ മാതാപിതാക്കളെ വിളിച്ചു വരുത്തിയ ശേഷം പോലീസ് വിട്ടയച്ചു.