പാചക വാതക വിതരണം നടത്തുന്ന ട്രക്ക് ഡ്രൈവര്‍മാര്‍ നവംബര്‍ അഞ്ചു മുതല്‍ അനിശ്ചിതകാലത്തേക്ക് പണിമുടക്കുമെന്ന് തൊഴിലാളി സംഘടനകള്‍ അറിയിച്ചു.
പണിമുടക്ക് സംസ്ഥാനത്ത് പാചക വാതക വിതരണം പ്രതിസന്ധിയിലാക്കും. വേതന വര്‍ധനവ് ഉള്‍പ്പടെ വിവിധ ആവശ്യങ്ങള്‍ ഉന്നയിച്ചാണ് പണിമുടക്ക്.
കഴിഞ്ഞ പതിനൊന്ന് മാസമായി വേതന വര്‍ധനവ് ആവശ്യപ്പെട്ടുള്ള അപേക്ഷ ട്രക്ക് ഡ്രൈവര്‍മാര്‍ നല്‍കിയിരുന്നു. എന്നാല്‍ അനുകൂല നിലപാട് സ്വീകരിക്കാൻ ഉടമകള്‍ക്ക് കഴിഞ്ഞില്ല. ഇതിനിടെ ഉടമകളും തൊഴിലാളികളും ലേബര്‍ ഓഫീസര്‍മാരും തമ്മില്‍ ഇരുപതോളം ചര്‍ച്ചകള്‍ നടന്നു. ഈ ചര്‍ച്ചകളിലും സമവായം ഉണ്ടാകാത്ത പശ്ചാത്തലത്തിലാണ് ട്രക്ക് ഡ്രൈവര്‍മാര്‍ സമരത്തിനൊരുങ്ങുന്നത്.
തൊഴിലാളികള്‍ ഇന്നലേ ഉച്ചവരെ പ്രതീകാത്മക സമരം നടത്തി . നവംബര്‍ അഞ്ച് മുതല്‍ സംസ്ഥാനത്തെ ഏഴ് പ്ലാന്റുകളിലാണ് പണിമുടക്ക് നടത്തുന്നത്. ട്രക്ക് ഡ്രൈവര്‍മാര്‍ പണിമുടക്കുന്നതോടെ സംസ്ഥാനത്ത് പാചക വാതക വിതരണം സ്തംഭിക്കും